Fiðluferð

18.9.2008 | 18:57

“Mamma, það er alveg jafn gott að læra á fiðlu eins og að vera í Gerplu (fimleikum), er það ekki?” Og mömmunni nísti inn að hjartarótum og svaraði “já-há, það er sko alveg eins gott”! Fórum saman og horfðum á fiðluhóptíma, Matthías æðislega rogginn með sig sat og horfði á hina leika ýmsar kúnstir. Hann var margoft spurður “hvað ert þú gamall?” Af það því stubbur er svo lítill eftir aldri þá hefur fólk líklegast gert ráð fyrir að mamman hafi logið til um kennitöluna til að koma honum í tónlistarnám. Hann er að verða 4 ára, en í stærð er hann eins rúmlega 2 ára. Hef svo sem áður sagt að þó ekkert annað væri, þá hefur hann nú ekki alveg genin með sér, maður myndi alls ekki segja að pabbinn væri tröllvaxinn og mamman er löngu hætt að bíða eftir boðunarbréfinu frá módelsamtökunum.

Allavegana fyrstu tvo einkatímana á Matthías ekki að mæta, bara ég og pabbinn . Ef við erum fljót að læra, þá fyrst fær Matthías að koma. Okkur fannst þetta frekar fyndið, Sumir fara á dansnámskeið, en við erum að fara að læra á fiðlu saman. Vorum að spá í að hittast í strætó á leið í fiðlutíma, eins og í gamla daga, jafnvel hringja í mömmu og bjóða henni með í fyrsta tímann.

En Matthías minn er svaka spenntur og heldur því reyndar fram að hann kunni núna á fiðlu. Honum finnst hann svo stór (þó ekki sé hann hár) og kom með þá snilldarhugmynd að skilja bílinn eftir og taka strætó heim úr fyrstu ferðinni í tónlistarskólann. Já, það hefði sko verið fullkominn dagur, fiðla og strætóferð!

Kveðja, Áslaug fiðla

Flokkur: Bloggar | Facebook

Athugasemdir

Tónlistarnám er alveg tilvalið fyrir strákana okkar með legginn sinn en held bara að fótbolti kæmi alveg til greina næsta sumar ef þeir væru settir í hokkíbrynju án herðapúðanna. Þær eru léttar og liprar en hylja leggsvæðið. Það er svo gaman á hliðarlínunni!

Talaði við Róbert í gær. Dælurnar eru á leið til landsins og settin, bakpoki, standur og klemma til að hengja dæluna á standinn fara í pöntun þessa dagana.

Kveðjur

Sigga

Sigríður Valdimarsdóttir (IP-tala skráð) 19.9.2008 kl. 10:13

Já rómantískt, það fara sko ekki allir í dans, einu sinni vildi ég fara á dansnámskeið en Jóni fannst miklu meira spennandi að fara á þýskunámskeið! Sem kom sér að vísu vel í Bad Orb ;)

Álfheiður (IP-tala skráð) 19.9.2008 kl. 15:37

Hæ elskan. Fenguð þið ekk örugglega boðskortið???? Ég er svo stressuð á þessu því að ég veit um tvo sem ekki hafa fengið:)

Góða helgi og knús

Sibba

Sigurbjörg Guðleif, 19.9.2008 kl. 16:06

Já Sigga mín, pælingin með hokkíbrynjurnar er frekar fyndin! En ætli þeir verði ekki að bíða þangað til að brunnur verður valkostur fyrir þá ? Frábært hvað þetta gengur hratt og mun auðvelda ansi margt, en er búið að tala við blöndun um nýjar pokastærðir? Verum í bandi! Knús!

Já, Álfheiður mín, par saman á þýskunámskeið það er mjög sætt og gagnlegt.. og gagnast kannski á fleiri stöðum en þýskumælandi löndum ha,ha! Og takk fyrir síðast, þetta var mikið stuð, knús!