Allt og ekkert

Nýja áhugamálið FACEBOOK í fullum blóma, var kannski of gagnrýnin, þó ég skilji ekki enn tilganginn.  Skemmtileg afþreyjing að sjá gömul (þó ekki endilega í árum) andlit.  Er enn óttalegur illi og ýti á fullt af vitlausum tökkum.

Fékk boð á tónleika FTT (félag tónskálda og textahöfunda) á fimmtudagskvöldið.  Það var svei mér áhugaverðir tónleikar og ánægð með að búið sé að ættleiða hann Svabba inn í þessa miklu tónlistarfjölskyldu sem flutti megnið af prógramminu.  Fór út að borða á Caruso á undan og fékk mér Canelloni með spínati, osti og kjötfyllingu.  Mjög gott og bráðnauðsynlegar upplýsingar til að varpa fram á alnetinu.

Bakaði köku og fylgdist með öðru auganu á hina  “spennandi” keppni um söngvarastöðuna í bandinu hans Bubba á föstudagskvöldið.  Frábærir söngvarar báðir þessir strákar.  Sigurvegarinn lofaði að taka aldrei þátt í Evróvision, en sú bón stjórnandans fannst mér doldið eins og að skammast út í hægri löppina, þegar maður stendur á þeirri vinstri , staddur í miðjum raunveruleikasjónvarpsþætti.  Kakan var hins vegar mjög góð, heit súkkulaðikaka með ís!

Laugardagskvöld, Borgarleikhúsið, Jesus Christ Superstar.  Var ekki alveg viss hvað mér fannst, allir söngvararnir komu mér þó á óvart, hver á sinn háttinn.  Leikmyndin sem fór í taugarnar á mér fyrir hlé var tekin í sátt eftir hlé og þjónaði vel sínum tilgangi.   Hljómsveitin var klikkgóð, ótrúlega þétt, sannfærandi og flott útsett!  Alveg gaman að sjá þetta í doldið öðruvísi búning, engar gæsir þó sem flugu hátt þegar ég sá þetta fyrir einhverjum doldið mörgum árum. 

Sunnudagur og hersingin fór í gönguferð út í Gróttu.  Þvílíkt sport og stuð að henda steinum út í sjó.  Stubbarnir reyndu þrír saman að rogast með risastóra hnullunga sem hæglega gátu lent á litlum tám, samt skárra en þegar litlu steinarnir fuku í áttina að  næstu hausum.  “Hjördís mín, þú verður að miða!” – “Það er enginn miði á þessum stein!”.  Hálfdán Helgi ætlar að fara fljótlega aftur og byggja sér hús úr stráum, en stráunum sem hafði verið safnað, var vinsamlegast vísað út úr bílnum!  Já, þetta fullorðna fólk er svo skrítið.

Knús knús, Kv. Áslaug 

Athugasemdir

[Begga (IP-tala skráð) 23.4.2008 kl. 14:48]

Hæ hæ!

Mér finnst þú nú barasta vera að standa þig vel á fésinu. Hefur alla vega ekki móðgað mig ennþá. Vona líka að ég móðgi engan heldur, því ég hef stundum enga hugmynd um hvað ég er að gera.

[Sigurbjörg Guðleif, 23.4.2008 kl. 15:44]

Vá skemmtilegir dagar hjá þér og ykkur. Vona að allt gangi vel og ég hlakka rosalega til að hlusta á diskinn þinn:)

Knús Sibba

[Áslaug Helga Hálfdánardóttir, 23.4.2008 kl. 18:49]

Hæ Begga mín og takk fyrir síðast.. já, mín alveg dottin í alls konar próf um hitt og þetta.. og takk fyrir póstinn aldrei að vita nema maður klambri einhverju saman!  Ánægð með þig að kommenta

Já Sibba mín, um að gera áður en aupairin fer í frí, því þá eru það bara ég og amerísku vinkonurnar saman-gaman og heima!  Þú verður sko ein af fyrstu til að fá að hlusta, förum fljótlega að taka törn í upptökum og vonandi get ég hent inn einu demói fljótlega! Knús til baka